لو دايما بتسمع من الناس كلام زي (عرفت ازاي هو انا قلتلك قبل كده؟) او (
انا استريحت جدا بعد ما اتكلمت معاك ) (انت بتفهمني جدا من غير ما اتكلم حتي اكتر
من الناس القريبين مني ) يبقي انت ENFJ
__________
المدرس أو البطل اجتماعي جدا بيكتسب طاقته من الخروج والتعامل مع الناس
وبيحب يشارك في انشطة كتير وينظم حفلات لكن بالرغم من كده هومتحفظ جدا في عرض نفسه
و الافصاح عن افكاره لدرجة انه ممكن يحس بالوحدة وهو مع الناس لانه مش بيتكلم عن
نفسه كتير وبيسمع اكتر , حاجات الناس بالنسباله أهم من حاجاته الشخصية وهو شخص
حساس ومحبوب , كمان بيقدريتوقع تصرفات اللي حواليه وهو افضل شخص في التعامل واعطاء
الحب والوقت والدعم ..علشان كده ال ENFJ
شخصية مريحة جدا في التعاملات والمناقشات مع اي
حد وشخصيتهم بتخليهم:
* عارفين هدفهم كويس وبيحاولوا يحققوه طول الوقت
* واعيين باللي حواليهم لدرجة انهم
بيحفظوا الطريق من اول مرة ولو شافوا حد مرة واحدة بيفضلوا فاكرينه
* بيقدروا يتعودوا بسرعة علي اي تغير وي move on بعد انتهاء العلاقات رغم احساسهم بالذنب
* بيظهروا واثقين جدا من افكارهم الا انهم في الحقيقة بيكونوا محتاجين توكيدات من
اللي حواليهم انهم صح وبيسالوا الناس عن رايهم في كل حاجة
شخصية المدرس بتمثل 5%من الناس وهي منتشرة اكتر في البنات ونادرة في الرجال
,اكتر الاعمال اللي بتليق علي الشخصية :
كاتب _مسوق_استشاري او طبيب نفسي
و في الشغل بيكون مبدع ومنظم وخدوم
____________
من مميزات الشخصية:
* ان عندها موهبة ف انها تطلع الحلو اللي جواك .. لانها مهتمة
جدا بمشاعر الناس اللي حواليها وبتعامل كل واحد بأسلوبه ,و عارفة مدخل كل شخص
وبتقدر تخليه مبسوط
*وهو شخص ناضج و طيب بس مش غبي, بالعكس
كلامهم فيه حكمة وتنمية بشرية و بعد ما تتكلم معاه بتتحمس وتحس انك حد مهم .. لو مكتئب واتكلمت
معاه مش هيسيبك غير وانت مزقطط حرفيا ,عشان بيحس ان تلبية احتياجات الناس
بالنسباله بمثابة انتصار
*عنده القدرة علي التعبير عن مشاعره ,لكن مش بيعمل ده كتير وميقدرش يعمل ده مع اي
حد .
*عارف نفسه عاوز ايه و الناس عاوزة ايه وبيخطط ويسعي انه يرضي جميع الاطراف
*بيخزن المعلومات المتفرقة وبيربطها ويطلع منها باستنتاج صحيح للدرجة اللي تخليك
تتساءل هو عرف ازاي
*حنون و دافي وفي نفس الوقت بيسيطر سيطرة مقبولة بتخلي اللي قدامه يقتنع ويعمل
الحاجة اللي نصحه بيها عن طيب خاطر
*قيادي بالفطرة وشخص ملهم و مؤثر بيتميز بالحيوية والمرونة , وهو شخص جدير بالثقة
لانه مخلص وملتزم , وبيعرف يقول شكرا علي اي حاجة بسيطة
*والاهم ان قدراته عالية جدا في التواصل والتحفيز والتعاطف والانسجام ف اي مكان
تحطه فيه ومع اي شخص كأنه بيكمل قطعة ال puzzle الناقصة ايا كان شكلها هو بيشكل نفسه وبي fit
لكن طبيعي يعد كل المميزات الجميلة دي, الشخصية يكون ليها شوية عيوب
_____________________
من مشاكل شخصية المدرس :
*انها حساسة تجاه النقد والخلافات , ومش بيهتم باحتياجاته
الشخصية , بيلوم نفسه كتير وبيحس بالذنب , صارم وبيحب يسيطر شوية
*لو اتحط في مكان مش مناسب وملقاش نفسه هيبقي محبط وحاسس بالذنب وحساس لاي نقد او
هيميل للتلاعب والسيطرة
*لما بينعزل بيكون قاسي اوي علي نفسه وافكاره مش كويسة وبيعاني دايما من جلد الذات
و فاكر نفسه وحش ومحتاج باستمرار حد يأكدله انه كويس ومش غلط
*بينتقد قرارات الناس ونواياهم وعنده مشكلة في الثقة بالاخرين لانه بيكون متوقع
منهم نفس المعاملة اللي بيقدمها
*عنده مشكلة في التنفيذ بالرغم من ان التخطيط بتاعه كويس
*مندفع لما بيعوز حاجة بيعملها في نفس الوقت
* الذاكرة طويلة الامد عنده مش شغالة كويس ومش مهتم بالتفاصيل
_____________________
لو بتتعامل مع حد ENFJ تجنب انك تقوله انت غبي, ولما يتكلم
اسمعله كويس واتاكد انه خلص كلامه للاخر وبعدها رد ,
سمعه كلام حلو زي ما هو بيعمل معاك .
اما لو انت ENFJ اهتم بنفسك زي ما بتهتم بالناس وكمان متنساش اهل
بيتك من الاهتمام ده, اتعلم تقول لأ لو حاجة مش مناسبة ليك , ادي نفسك فرصة
للتفكير قبل ما تتصرف , متهملش الجزء الروحاني اللي جواك و تطوع في جمعية خيرية ,
واتعود تستخدم نوتة علشان التفاصيل اللي
بتنساها دايما
بقلم/ د.إسراء محمود
تعليقات